bahaar aai to maikhane se nikle
bahak nikle ki bahkane se nikle

haram tak raushni hi raushni thi
hum is aalam mein but-khane se nikle

pighal kar bah gai zanjir-e-kaunain
wo shoale aaj paimane se nikle

nigah-e-mast ne daman na chhoda
nikalne ko to maikhane se nikle

ajab kya hai ki is zulmat mein ai dost
suragh-e-shama parwane se nikle

'rawish' apna dil-e-nadan salamat
hazaron kaam diwane se nikle