bahaar ban ke mere har nafas pe chhai ho
ajab ada se meri zindagi mein aai ho

tumhaara husn wo taswir-e-husn-e-kaamil hai
khuda ne khas hi lamhon mein jo banai ho

sharab hai na sahar hai magar ye aalam hai
kisi ne jaise nigahon se mai pilai ho

teri tarah hi gurezan hai nind bhi mujh se
qasam hai teri jo ab tak qarib aai ho

tu us nigah se pi waqt-e-mai-kashi 'taban'
ki jis nigah pe qurban parsai ho