bahaaron mein tilism-e-gul-rukhan ka zikr karne do
shamim-e-kakul-e-ambar-fishan ka zikr karne do

wo jis se dur ho jae gham-e-jaanan gham-e-dauran
usi daur-e-sharab-e-arghawan ka zikr karne do

budhapa dur hai zohd-o-wara jis ka taqaza hai
jawani mein to kuchh ishq-e-butan ka zikr karne do

ye shoale kis ne barsae ye aatish kis ne bhadkai
zamin pe rahne walo aasman ka zikr karne do

tabahi tak to aa pahunche ba-faiz-e-maghfirat waiz
khudara ab to mir-e-karwan ka zikr karne do