bahs mein donon ko lutf aata raha
mujh ko dil main dil ko samjhata raha

un ki mahfil mein dil-e-pur-iztirab
ek shoala tha jo tharraata raha

maut ke dhoke mein hum kyun aa gae
zindagi ka bhi maza jata raha

na-shagufta hi rahi dil ki kali
mausam-e-gul bar-ha aata raha

jab se tum ne dushmani ki ikhtiyar
e'tibar-e-dosti jata raha

apni hi zid ki dil-e-betab ne
un ke dar tak bhi main samjhata raha

jaur to ai 'josh' aakhir jaur hai
lutf bhi un ka sitam dhata raha