bahut sa ho chuka hai aur kuchh nahin hua hai
hamara sara asasa tah-e-zamin hua hai

jo ho chuka hai akarat jo wa hua uqda
jo hona chahiye tha ab talak nahin hua hai

shikast-o-fath jaza-o-saza hisab-o-kitab
hamare sath ye sab kuchh idhar yahin hua hai

hamari khak uda di gai sar-e-aflak
hamara koi hawala bacha nahin hua hai

hamein tumhaari zarurat hai aur is ke siwa
tumhaare sath koi 'ishq to nahin hua hai