baith ja kar sar-e-mimbar waiz
ho gaya tu to mere sar waiz

mai to jaez nahin ye jaez hai
roz khata hai mera sar waiz

band karta hai dar-e-tauba kyun
khol kar waz ka daftar waiz

waizon ki main karun kya tarif
ghar mein mai-khwar hain bahar waiz

mai-kashon hi ke liye hai ye baat
jo hai dil mein wahi lab par waiz

dekh kis rang se utthi hai ghata
tah kar ab waz ka daftar waiz

kis tarah pite hain pine wale
dekh lena lab-e-kausar waiz

maut bhi aati hai to hile se
aa gaya rindon mein kyunkar waiz

sakhtiyan rindon pe karte karte
aql par pad gae patthar waiz

aatish-e-tar ka jo pad jae maza
phunk de waz ka daftar waiz

rind aape se jo bahar hain to hon
tu na ho jame se bahar waiz

shisha-e-dil ka khuda hafiz hai
teri har baat hai patthar waiz

zikr-e-mai waz mein jab aata hai
jhumta hai sar-e-mimbar waiz

le ke aankhon se lagata saghar
padh jo leta khat-e-saghar waiz

mahfil-e-waz mein kyun jaun 'jalil'
hain mujhe shisha-o-saghar waiz