baithe hain id ko sab yar baghal mein le kar
baithen hum kya dil-e-bimar baghal mein le kar

kushta-e-naz faqat is pe hain nazan ji mein
ki nikalta hai wo talwar baghal mein le kar

roe hum us ki tamanna-e-ham-goshi mein
dil-e-mayus ko na-chaar baghal mein le kar

bad-gumani se hamein baithte uthte hai ye soch
baithe honge use aghyar baghal mein le kar

mai-e-ulfat ki tarang aai to aaya dauda
shisha-e-mai ko wo mai-khwar baghal mein le kar

ku-ba-ku khana-nashini ka ho us ki charcha
baithe jo tujh sa trahdar baghal mein le kar

shab-e-tanhai mein so rahte hain mushtaq tere
ba-tasawwur tujhe har bar baghal mein le kar

sun ke hum mahw-e-chaman us ko 'ghazanfar' aae
dil-e-pur-dagh se gulzar baghal mein le kar