bala ka shor-o-fughan hai nihan khamoshi mein
main khul ke samne aaya hun parda-poshi mein

nigah-e-adl se dekhen to mir-e-mahfil ke
jalal-o-mal muawin hain aib-poshi mein

main tan hun shah-e-rag-e-jaan ko mujhe bachana hai
chala hun jaanib-e-kashmir sarfaroshi mein

jis imbisat se suqraat pi gaya tha jam
use yaqin tha amrit hai zahr-noshi mein

ye kya ki zoam-e-qazawat mein qaid kar liya hai
koi to aib nikalen janab doshi mein

tumhaari aankh se milta hai jo zamane ko
kahan surur hai aisa sharab-noshi mein

yatim-e-taza ko ye nagawar guzregi
aza ki baat na kar rasm-e-taj-poshi mein