ban ke khushbu wo basa hai mujh mein
har nafas mauj-e-saba hai mujh mein

hai tasawwur mein koi mast-e-khiram
ek qayamat si bapa hai mujh mein

taqat-e-jumbish-e-pa ho ki na ho
himmat-e-laghzish-e-pa hai mujh mein

dil mein ek tir taraazu ho kar
dard ko tol raha hai mujh mein

koi arman na nikla ab tak
ek mela sa laga hai mujh mein

hasb-e-har-jabr-e-mashiyat 'akhgar'
wasf-e-taslim-o-raza hai mujh mein