banaen ret pe ghar apna ye umang na ho
ki mauj-e-ab se hargiz hamari jang na ho

sitamgari ya tashaddud hamara dhang na ho
ye hansti khelti duniya kati patang na ho

khud apne khun se tehwar hum manate hain
khuda-ra aisi masarrat bhari tarang na ho

girengi uthti rahengi diwaren aangan ki
dilon ke bich khalish ki agar surang na ho

sad ehtiram ke qabil wo sang-e-aswad hai
zamin pe us ke muqabil ka koi sang na ho

kushada-zehn ho 'iqbaal' tum sabhon ke liye
kisi bashar ke liye bhi nigah-tang na ho