bandhna dil ko mere zulf-e-girah-gir ke sath
khub khelega ye qaidi teri zanjir ke sath

pahle wo aae to baad un ke adu ko dekha
khwab aaya bhi to aaya mujhe tabir ke sath

kisi banke ke banae hue abru hain tere
khub takraya hai shamshir ko shamshir ke sath

log kahte hain ki is dil mein khuda rahta hai
kis liye chal diya phir us but-e-be-pir ke sath

aaj main ja ke kahunga ye adu se 'asghar'
apni taqdir badal le meri taqdir ke sath