bane-banae hue raston pe ja nikle
ye ham-safar mere kitne gurez-pa nikle

chale the aur kisi raste ki dhun mein magar
hum ittifaq se teri gali mein aa nikle

gham-e-firaq mein kuchh der ro hi lene do
bukhar kuchh to dil-e-be-qarar ka nikle

nasihaten hamein karte hain tark-e-ulfat ki
ye khair-khwah hamare kidhar se aa nikle

ye khamushi to rag-o-pai mein rach gai 'nasir'
wo nala kar ki dil-e-sang se sada nikle