barae-dilkashi lafz-o-maani mang leta hai qalam se roz kaghaz ek kahani mang leta hai shab-e-furqat mein jab dil dub jata hai udasi mein tere rangin tasawwur se jawani mang leta hai bhula deta hai azmat pyas mein apni samundar bhi badha kar hath dariyaon se pani mang leta hai charagh-e-rahguzar hun main haqiqat hai magar ye bhi kabhi suraj bhi mujh se zau-fishani mang leta hai rahe ye baat bhi pesh-e-nazar zill-e-ilahi ke falak de kar zamin ki hukmrani mang leta hai bharosa kijiye kis ki ata par ai 'kamal-anwar' khuda bhi hum se wapas zindagani mang leta hai