bare gham-e-firaq uthata raha hun main
shama jala jala ke bujhata raha hun main

sare-jahan ko dil se bhulata raha hun main
bas yaad teri dil mein basata raha hun main

diwar-o-dar ke dil ke nazar ke khayal ke
har aaine se khud ko chhupata raha hun main

nazren utha ke dekh bhi le ek nazar mujhe
ai dost teri bazm mein aata raha hun main

badhta rahe shabab ye har roz har ghadi
aaina ban ke tujh ko sajata raha hun main

is shahr-e-be-wafa mein jafaon ke baad bhi
'arpit' wafa ke phul khilata raha hun main