barf-zar-e-jaan ki tah mein kholte pani ka hai
jo bhi qissa hai lahu ki shoala-samani ka hai

aasman se raushni utri bhi dhundla bhi chuki
nam raushan hai to bas zulmat ki tabani ka hai

regzar-e-lab ki har su ug rahi hai tishnagi
aankh mein manzar uchhalte-kudte pani ka hai

be-sabab hargiz nahin dast-e-karam kam kam idhar
us ko andaza hamari tang-damani ka hai

shahr ho ya ho bayaban ghar ho ya koi khandar
silsila chaaron taraf ghul-e-bayabani ka hai

mod par pahunche to dekhoge ki har manzil hai sahl
bas yahi ek rasta hai jo pareshani ka hai