barg aur tarah ke hain samar aur tarah ke
is bar hain gulshan ke shajar aur tarah ke

har chand wahi kuza-gari hai sar-e-bazar
darkar hain ab dast-e-hunar aur tarah ke

aasan nahin ab bhi tera jada-e-dushwar
darpesh hain ab hum ko safar aur tarah ke

wo log jo chalte hain rah-e-am se mutazad
milte hain unhen rahguzar aur tarah ke

uftad mein yaksan nahin patal kisi ki
hain sab ke liye us ke bhanwar aur tarah ke

aaghaz mein kuchh aur thi anjam ki ummid
aasar hain ab pesh-e-nazar aur tarah ke

taqwim-e-tahayyur mein 'kafil' aa to gae hum
gardish mein hain ab sham-o-sahar aur tarah ke