barish ke qatre ke dukh se na-waqif ho
tum hanste chehre ke dukh se na-waqif ho

tum ne sirf bichhad jaane ka karb saha hai
pa kar kho dene ke dukh se na-waqif ho

ek hi chhat ke niche rahte hain hum lekin
tum mere lahje ke dukh se na-waqif ho

sath kisi ke rah kar jo tanha katta hai
tum aise lamhe ke dukh se na-waqif ho

hathon ki chudi ki zaban samajh lete ho
phaile hue gajre ke dukh se na-waqif ho

jo manzil tak ja ke aur kahin mud jae
tum aise raste ke dukh se na-waqif ho