barson pahle chalte chalte yunhi utha laya
kali raaton se main ek raushni utha laya

ishq ko wahin chhod aaya main haal par us ke
ishq mein se par apni bandagi utha laya

surkh se kisi kapde ko lapete aai sham
mano aasman us ki odhni utha laya

puchhi jab misal us ke husn ki kisi ne to
phul ki main nazuk si pankhudi utha laya

ye bhi ek inayat hai us ke pahlu se hasil
yani jab bhi aaya main tazgi utha laya

chuma main ne us ka matha badi mohabbat se
aur honton par apne shairi utha laya