bas dikha de rah-e-mai-khana koi
le chale ya su-e-virana koi

kya mila farzanon mein rah kar mujhe
un se to behtar hai diwana koi

rahguzar-e-shauq ka hai ye karam
ho gaya apna hi begana koi

aaj ke haalat par likhun to kya
gar likhun samjhoge afsana koi

main hun aur tanhaiyon ka dasht hai
dard ko mere nahin jaana koi

main ne bhi sikha hai duniya se bahut
sikhe mujh se bhi to gham khana koi

kahte hain sahil se aksar mehrban
hai ghazal ya harf-e-rindana koi