bas ek khata ki musalsal saza abhi tak hai
mere khilaf mera aaina abhi tak hai

sabhi charagh andheron se mil gae lekin
harif-e-mauj-e-hawa ek diya abhi tak hai

mita sake na use hadson ke dariya bhi
wo ek nam jo dil par likha abhi tak hai

giri hai meri jo dastar gham hua lekin
ye shukr karta hun band-e-qaba abhi tak hai

nazar utha ke kaha mai-kade mein saqi ne
wo kaun hai jo yahan parsa abhi tak hai

na jaane kaun se sadmon ka shor tha is mein
guzar chuka wo idhar se sada abhi tak hai