chalega jam kisi ka na us ke jam ke baad
piyega kaun 'munawar' se tishna-kaam ke baad

jo raaz tha meri aawargi pe ifsha tha
tilism ban gai duniya mere qayam ke baad

kiya hai khun-e-tamanna ne surkh-ru kya kya
tamam kaam hua arz-e-na-tamam ke baad

jo be-talab mujhe bakhsha tha mangne pe bhi de
karim bukhl ye kaisa hai lutf-e-am ke baad

hazar haif 'munawar' ki tira-bakhti par
fuzul sa hai takhallus ye us ke nam ke baad