bas ek sawal pe jina muhaal hai mera
sawal kyon na karun ye sawal hai mera

kuchh is liye bhi har ek se meri nahin banti
zamir zinda hai aur khun lal hai mera

main tujh ko chhu ke bahut dur ho gaya tujh se
ki ye uruj se kaisa zawal hai mera

malal ye nahin mujh ko tu meri ho na saki
main tera ho na saka ye malal hai mera

ye rang rup ye yauwan tumhaare hain lekin
ye shokhiyan ye adaen kamal hai mera