bas-ki khush-rang nigahon ko utha sher suna
aa mere mutrib-e-shab raqs mein aa sher suna

ai ki tartib-o-tayyun mein chhupi baad-e-shimal
ai khunuk sham ki manus hawa sher suna

hai ye tashrih-talab rang-e-chaman bu-e-chaman
shahr-zad aaj kisi bagh mein aa sher suna

hae is jism mein chadhta hua khwab-awar ishq
hai rag-o-pai mein machalta sa nasha sher suna

uf wo yakh-basta sarabon mein hararat ka fareb
ai fusun-lams zara barf hata sher suna

main ki is jhil kinare pe bhatakti hui raat
tu sahar-khez nigah hosh-ruba sher suna