bas yahi masala hai donon ka
ishq ye dusra hai donon ka

is liye ehtiyat hawi hai
ek sa tajraba hai donon ka

wasl ki lazzaten bhi chahte hain
dil bhi ukta raha hai donon ka

phir ishaaron mein baat kaise ho
ek hi zawiya hai donon ka

ladte rahte hain zehn-o-dil har waqt
jaane kya masala hai donon ka

donon kirdar ek se hain magar
munfarid waqia hai donon ka

hum to donon hi pir-zade hain
ek hi silsila hai donon ka