bazgasht chaar-su sadaon ki
baat kya kijiye nazaron ki

dil mein khushbu basi hai sandal ki
raqs karti hui fazaon ki

sat rangon ki qaus hai har su
phul dar phul in qataron ki

qissa-e-hijr ki kahani mein
baat hai sirf chand taron ki

hum ne odhi hai ek siyah chadar
aap ke zulf ki ghataon ki

husn ka kya muwazana kije
khud wazahat ho tum bahaaron ki

dhup jaisi tamazaten har dam
baat hi aur man ki chhanw ki

hum ne to khud pe inhisar kiya
koi hajat nahin sahaaron ki