be-asar aarzu be-asar hai dua
ba-asar hai faqat ek us ki raza

wo gunahgar mahshar mein bakhsha gaya
rahmat-e-haq pe jis ne bharosa kiya

zindagi ne mujhe munh lagaya na jab
munh chidhane lagi mera zalim qaza

dast-e-qudrat mein main ek khilauna sa hun
kis liye hai gunahon ki mujh ko saza

naujawani mein to mahw-e-ishrat rahe
ab budhape mein aai hai yaad-e-khuda

dil kisi ke tasawwur mein khoya rahe
dard-e-dil ki yahi hai faqat ek dawa

waqt aisa bhi aata hai insan par
hona padta hai maidan mein tanha khada

jaane kyon aaj 'laghar' ne chup sadh li
warna wo roz deta tha haq ki sada