be-qasd safar jate hain malum nahin kyun
phir khud hi thahar jate hain malum nahin kyun

hum pyar se jine ki dua dete hain jin ko
wo log bhi mar jate hain malum nahin kyun

kuchh log tujhe dekh ke ai fasl-e-bahaaran
ba-dida-e-tar jate hain malum nahin kyun

ek wahm samajhte the haqiqat ko jo kal tak
ab khwab se dar jate hain malum nahin kyun

utre hue chehron ko bhi ye kahte suna hai
kuchh hum se bhi dar jate hain malum nahin kyun

ek silsila ashk hai shabnam magar is se
gulzar nikhar jate hain malum nahin kyun

manzil ki taraf rah-e-mohabbat ke musafir
be-rakht-e-safar jate hain malum nahin kyun

kuchh dekh ke kuchh soch ke kuchh log jahan se
chup-chap guzar jate hain malum nahin kyun

kashti ko dubo kar usi kashti ke muhafiz
khud par utar jate hain malum nahin kyun

ghar mein koi aaram ki surat nahin phir bhi
thak-haar ke ghar jate hain malum nahin kyun

han aks-e-rukh-e-sang-zada se bhi to ai 'lais'
aaine sanwar jate hain malum nahin kyun