be-tah meri nazar hai ki khud kam-nazar hun main
az-bas isi khayal se zer-o-zabar hun main

jis ko guman hai ki main hun sahib-e-kamal
us ko khabar nahin ki bahut be-khabar hun main

farman-e-did dil ko dun ya dun dimagh ko
is baat ki samajh se abhi dur-tar hun main

zahir mein khamushi ke kisi shai mein hun dhala
dar-asl apne aap mein ek shor-o-shar hun main

raushan hua ye mere sukhan se jahan par
is daur-e-mashq-e-jaur ka ek nauhagar hun main

taqdir apni mujh ko na aai sanwarni
lekin ba-zoam-e-ap bada zi hunar hun main

ai rabb-e-zul-jalal mujhe bakhsh aagahi
duniya ke pech-o-kham mein ulajh kar kidhar hun main

'amjad' pe ho karam ki nazar malik-e-jahan
teri ata se khub se bhi khub-tar hun main