be-wajh nain hai aaina har bar dekhna
koi dam ko phulta hai ye gulzar dekhna

nargis ki tarah khak meri ugen hain chashm
tuk aan ke ye hasrat-e-didar dekhna

khinche to tegh hai haram-e-dil ke said par
ai ishq par bhala tu mujhe mar dekhna

hai naqs-e-jaan did tera par yahi hai dhun
ji jao yar ho mujhe yak-bar dekhna

ai tifl-e-ashk hai falak-e-haftamin pa arsh
aage qadam na rakhiyo tu zinhaar dekhna

puchhe khuda sabab jo mere ishtiyaq ka
meri zaban se ho yahi izhaar dekhna

har naqsh-e-pa pe tadpe hai yaro har ek dil
tuk waste khuda ke ye raftar dekhna

karta to hai tu aan ke 'sauda' se ikhtilat
koi lahr aa gai to mere yar dekhna

tujh bin ajab maash hai 'sauda' ka in dinon
tu bhi tuk us ko ja ke sitamgar dekhna

ne harf o ne hikayat o ne sher o ne sukhan
ne sair-e-bagh o ne gul-o-gulzar dekhna

khamosh apne kalba-e-ahzan mein roz o shab
tanha pade hue dar-o-diwar dekhna

ya ja ke us gali mein jahan tha tera guzar
le subh ta-ba-sham kai bar dekhna

taskin-e-dil na is mein bhi pai to bahr-e-shaghl
padhna ye sher gar kabhu ashaar dekhna

kahte the hum na dekh saken roz-e-hijr ko
par jo khuda dikhae so na-chaar dekhna