bhala chahega koi kya kisi ka
ho dushman aadmi jab aadmi ka

jafa-kari hai zinda aap hi se
jafa-kari hai shewa ap hi ka

mera shewa hai ikhlas-o-mohabbat
bura chahunga main kyon kar kisi ka

khuda ka shukr hai us bewafa ne
sabab puchha hai meri khamushi ka

tere dil mein bhi ho dard-e-mohabbat
tera dil kash ho jae kisi ka

dilon mein hasrat-e-takhrib pinhan
labon pe zikr sulh-o-ashti ka

yahi mearaj hai khud-agahi ki
na todo dil zamane mein kisi ka

wahi dushman hue hain aaj 'asi'
jo dam bharte the kal tak dosti ka