bhale din aaen to aane wale bure dinon ka khayal rakhna
tamam khushiyon ke jamghaton mein bhi thoda thoda malal rakhna

wo ja raha ho to wapsi ke tamam imkan jaan lena
jo laut aae to kaise guzri ye us se pahla sawal rakhna

agar kabhi yun lage ki sab kuchh andheri raaton ke dao par hai
to aisi raaton mein dar na jaana to chand yaaden ujal rakhna

faqat tasanno faqat takalluf tamam rishte tamam nate
to kya kisi ka khayal rakhna to kya rawabit bahaal rakhna

yun hi akele raha kiye to udas hoge nirash hoge
jo aafiyat chahte ho 'rashid' to chand rishte sambhaal rakhna