bhanwar se bach ke wo sahil ke pas dub gaya
jahan ka dekh ke khauf-o-hiras dub gaya

ajab se khauf mein lipta hai ganw ka panghat
suna hai phir se koi dewdas dub gaya

mujhe sharab hi itni mili thi duniya se
ki mare sharm ke mera gilas dub gaya

gawara ho na saka us ko bahr ka ehsan
labon pe le ke qayamat ki pyas dub gaya

kahun to kis se kahun apne dil ki taklifen
mere hi gham mein mera gham-shanas dub gaya

hua jo samna suraj ka mere zakhmon se
falak pe chhod ke apna libas dub gaya

'nadim' apne ghamon se nikal chuka tha magar
gham-e-jahan se ho kar udas dub gaya