bharam khulne na pae bandagi ka
wo matam kar rahe hain zindagi ka

tajjub hai khulus-e-dostan par
nahin gham dushmanon ki dushmani ka

bhadak uthti hai dil mein aatish-e-gham
khayal aata hai jab un ki gali ka

abhi hai band aankh insaniyat ki
abhi dam ghut raha hai aadmi ka

tumhaari yaad ne ki rahnumai
khayal aaya mujhe jab be-khudi ka

lagi dil ki ho alfaz-o-bayan mein
yahi ek khas fan hai shairi ka

wahi dushman bane baithe hain 'maikash'
jo dam bharte the apni dosti ka