bhid mein gungon ki pahchan banane ke liye
hausla chahiye aawaz uthane ke liye

din insan ki bhalai ke liye aaya tha
rah gaya ab ye faqat khane-kamane ke liye

pyar ko bhulna aasan nahin hai sahab
muddaten lagti hain ek shakhs bhulane ke liye

roz-do-roz ka qissa na samajhiye is ko
ishq to hota hai ek umr rulane ke liye

maut ke baad meri 'raaz' padhe jaenge
mere ashaar meri yaad dilane ke liye