bikhre bikhre din hote hain raaten jaga karti hain
galiyan thak kar so jati hain sadken jaga karti hain

ghussa shokhi aadat qisse sab pichhe chhut jata hai
log chale jate hain un ki baaten jaga karti hain

jab se mohabbat hoti hai is mein dam atka rahta hai
jism bikhar jata hai lekin aankhen jaga karti hain

wasl ke lamhon mein sare lafz aur zaban so jate hain
kamre ki tanhai mein bas sansen jaga karti hain

bete aawaragardi mein rahte hain mashghul magar
nalaeq beton ki khatir maen jaga karti hain