bina tere adhuri hai khushi sare zamane ki
wajah kuchh bhi nahin hai zindagi mein muskurane ki

samajhta hi nahin koi zaban mazlum logon ki
zarurat aa padi hai ab qalam kaghaz uthane ki

lagai thi jo ummiden meri man ne kabhi mujh se
karungi main yahi koshish unhin sab ko nibhane ki

bache hain gham muqaddar mein nahin baqi khushi koi
karun koshish sabhi se aansuon ko main chhupane ki

mukammal ho nahin sakti kabhi bhi 'aisha' ab to
khabar koi to di hoti mujhe yun chhod jaane ki