bu-e-gul rang-e-hina naz-e-nasim-e-sahari
tere afsun ki sab ai dost hai afsana-gari

ek hi haal pe qaem hai azal se ab tak
husn ki ishwa-gari ishq ki shorida-sari

jaane wale to sitaron se pare ja pahunche
ahl-e-mahfil liye baithe rahe shishe ki pari

ab koi farq nahin in mein khazaf hon ki guhar
hae ai ahd-e-basirat ye teri be-basari

kitne majruh hain is daur mein ehsas-o-shuur
kitni mazlum hai is ahd mein baaligh-nazari

tujh ko ai dost 'wafa' yaad rahe ya na rahe
han magar yaad rahegi meri viran-nazari