bujh gae shoale dhuan aankhon ko pani de gaya
ye achanak mod dariya ko rawani de gaya

ab to us ki dhup mein jalta hai mera tan-badan
kya hua wo mehr jo subhen suhani de gaya

ji mein zinda ho gain kya khwahishen bisri hui
phir koi yusuf zulekha ko jawani de gaya

phir hua ehsas yun mujh ko ki main ek naqsh hun
kaun taswiron ko hukm-e-be-zabani de gaya

ped nange ho gae raston pe patte hain abhi
han magar tufan kuchh yaaden nishani de gaya

main subuk-sar tha hawaon ki tarah par ab nahin
yak-ba-yak rukna tabiat ko girani de gaya

bolta chehra jhuki aankhen chhupa mat hath se
tera chup rahna mujhe kya kya maani de gaya

jaise mere pair mauj-e-wapsin par jam gae
har naya lamha koi surat purani de gaya

ai lab-e-goya na chhin jae kahin ye zaiqa
chatiye wo zakhm jo shoala-bayani de gaya

main ne 'shahid' aaine mein apni surat dekh li
ye zara sa waqia puri kahani de gaya