bujh gai aag to kamre mein dhuan hi rakhna
dil mein ek gosha-e-ehsas-e-ziyan hi rakhna

phir isi rah se milegi nae iblagh ko samt
sher ko dard ka uslub-e-bayan hi rakhna

aah manzar ko ye barfati hui be-safari
sath pighle hue raston ke nishan hi rakhna

kah na sakna bhi bahut kuchh hai riyazat ho agar
zakhm honton ke sar-e-ijz-e-bayan hi rakhna

jaise wo saneha lamha bhi zamana bhi hai 'saz'
yaad us shakhs ke jaane ka saman hi rakhna