bujha deta hawas ki tishnagi wo jam hai saqi
jahan main jis se milta hun wahi nakaam hai saqi

nasha gahra kahan itna ki hon chaudah tabaq raushan
taraqqi-yafta mulkon ki baada kham hai saqi

mere atraf hai tira-shabi mein nur ka halqa
ki sham-e-rah maikhane se ghar tak jam hai saqi

kitab-e-sirat-o-akhlaq de insan ke hathon mein
taraqqi danish-o-ijad ki nakaam hai saqi

suna iqbaal-e-isyan khalwaton mein wajh-e-bakhshish hai
kalisaon mein ye tarz-e-ibaadat aam hai saqi

wahi zalim hain shoala-bar insanon ki basti par
wo israel jin par barish-e-ikram hai saqi

amal-paira wahi hain khush-khor-o-khush-zi pe sakhti se
zaban pe jin ki faqa-kash ka har dam nam hai saqi

kahan nan-e-jawin aur roghan-e-zaitun-o-shaikh-e-din
rausa ke yahan milan-e-dawat aam hai saqi

riwaj-e-madrasa hai dopahar ke waqt qailula
yahan shab zinda-dari mail-e-aram hai saqi

khafa hai madrasa ek sidq-go-e-nagpuri se
tera mai-khwar is mahaul mein badnam hai saqi