soch ki parchhaiyan hain aur main
tajrabon ki sipiyan hain aur main

shahr hai khamosh jaise ho khandar
dhup mein jalte makan hain aur main

tez aandhi chirti jae badan
dhund mein lipte jahan hain aur main

khun mein luthde saron ke darmiyan
dar ki khamoshiyan hain aur main

phul si chidiya zamin par kya giri
zehn mein raqsan guman hain aur main

gard hoti manzilen hain samne
ret par mitte nishan hain aur main

zard mausam odh kar soya badan
ruh ki pahnaiyan hain aur main