bujha ho dil to bahaaron ko bhi khizan kahiye
har ek phul ko tashbih-e-zakhm-e-jaan kahiye

guzar rahe hain nazar se to anginat chehre
sawal ye hai kise apna raazdan kahiye

hai jis ka zikr sahifon mein ‘ahd-e-mazi ke
kahan hai sar pe mere ab wo aasman kahiye

tahen shu'ur ki khulti rahengi ta-ba-hayat
abhi yaqin-e-ta’ayyun ko bhi guman kahiye

'niyaz' zakhm-e-tamanna hain mere sine mein
mujhe nigar-e-mohabbat ka raaz-dan kahiye