bujhe agar badan ke kuchh charagh tere hijr mein
jala liye sukhan ke kuchh charagh tere hijr mein

chaman khizan khizan ho jab bujha bujha hua ho dil
karen bhi kya chaman ke kuchh charagh tere hijr mein

shab-e-firaq par hua shab-e-visal ka guman
mahak uthe milan ke kuchh charagh tere hijr mein

udasiyon ke habs mein jo teri yaad aa gai
to jal uthe pawan ke kuchh charagh tere hijr mein

so kyon na dil ke dagh gin ke kat lije aaj shab
gine the kal gagan ke kuchh charagh tere hijr mein