ata-e-dard ki tarsil na-mukammal hai
hamari zat ki tashkil na-mukammal hai

hamare rog mein hai band karobar-e-jahan
hamare shahr mein tatil na-mukammal hai

mita nahin hai andhera ghamon ka duniya se
nashat-e-ruh ki qindil na-mukammal hai

ai aasman tera zulm mukhtasar thahra
hamare zabt ki tafsil na-mukammal hai

nahin hai ghaur-talab arz-e-muddaa jab tak
tumhaare hukm ki tamil na-mukammal hai

nisar us pe 'raza' jab talak na ho paen
hamare azm ki takmil na-mukammal hai