buzurgon ki nasihat yaad rakhna
ghamon mein ghir ke bhi dil shad rakhna

mera dil hai hazaron gham ka maskan
khuda is ghar ko tu aabaad rakhna

jahan patthar ka hota ja raha hai
hai jina to jigar faulad rakhna

meri takhliq-e-awwal naqd-e-sani
ye nukta ru-ba-ru naqqad rakhna

agarche ye zamana tang-dil hai
hamesha zehn-o-dil aazad rakhna

ye duniya ehtajaji ho gai hai
na apne lab pe tum fariyaad rakhna

'zamir' apni badaulat chal raha hai
mubarak aap ko ustad rakhna