chaak par kuza-gar hai mahw-e-sukhan
gul khile ja rahe hain dasht-o-daman

hum darida-badan darida-badan
ek nae zawiye pe naqsh-e-kuhan

sher-o-shair hue hain shir-o-shakar
kya baham ho gae zamin-o-zaman

ek haijaan nisbaton mein kahin
ek reg-e-rawan hai dasht-e-sukhan

mujh se kya puchhti hai sairabi
kaise rahte hain log tishna-dahan

talkh tezabi tursh-tar lahja
un ke mabain ek shirin-dahan

hae diwar-e-girya hae hae
teri peshani pe hain kitni shikan

kya wahan bhi bagule uthte hain
aao dekh aaen chal ke su-e-adan

aasman chup hai aur zamin khamosh
kuchh khabar hai tumhein bhi arz-e-watan