chaaron atraf yagana main hun
jise dekha yahi jaana main hun

mujh se milne ko chale aate hain
log kahte hain zamana main hun

tum mujhe sochte rahte ho bahut
is ka matlab hai fasana main hun

mujhe wahshat se koi khauf nahin
dasht ki samt rawana main hun

use kahna ki chala aae yahan
us ko jakar ye batana main hun

darna banta hi nahin us ka 'suhaib'
apni hairat ka nishana main hun