chahe ghar mein rok de ya rahguzar mein rok de
wo jise chahe use aadhe safar mein rok de

ye agar bahar gain to khamushi chha jaegi
meri aawazen mere diwar-o-dar mein rok de

nakhuda us jal-pari ke pas pahuncha de mujhe
ya to us kashti ko le ja kar bhanwar mein rok de

chand qadmon par badal jate hain mere ham-safar
ai khuda koi nazara to nazar mein rok de

us ki aamad se makan-e-dil bahut shadab hai
aur kuchh din is nae mehman ko ghar mein rok de