nahin ki zinda hai bas ek meri zat mein ishq
main sach kahun to faqat hai hi kaenat mein ishq

main ishq-zad charaghon ki bazm mein raha hun
so jal raha hai abhi mere daen hat mein ishq

wo husn nur ki barish mein jab naha raha tha
machal raha tha bahut tab tajalliyat mein ishq

main sochta hun ki kya hota dahr mein har su
agar na hota kahin tere shash-jahat mein ishq

qalam se likkha gaya hai waraq pe harf-e-sukut
tadap raha hai meri nilgun dawat mein ishq

kahin pe zinda hai ye jit ke har ek bazi
kahin pe raushaniyan kar raha hai mat mein ishq

kahin hain duniya ki ranginiyan taaqub mein
kahin jhalakta hai meri har ek baat mein ishq