chahe jo haal bhi ho un ki nazar hone tak
hum jiye jaenge aahon mein asar hone tak

be-khudi nam hai ehsas-e-khudi ka shayad
warna kuchh aur tha mansur khabar hone tak

sabr se kaam le ai dil is andhere se na dar
zulmat-e-shab hai sapedi-e-sahar hone tak

jab jo chahen wo kahen apne ko waiz lekin
bartari mujh ko to hasil hai bashar hone tak

hae wo husn-e-yaqin aah wo ummid-e-karam
muntazir tha tera bimar sahar hone tak

yun to jina hai ba-har-haal magar ai 'asi'
zindagi asl mein hai soz-e-jigar hone tak